الثلاثاء، 22 يوليو 2008

تــــاج


باستأذنكم بس اوقف الدورة مؤقتا لسبب بسيط


ان جاء لى تاج من فترة وانا كنت بدأت الدورة فمعرفتش احل الاسئلة اللى كانت فيه


لكن الان استأذنكم انى احله وبعدين نكمل الدورة


التاج جاء لى من مدونة الاخ : (اخوانى حتى النخاع)

وربنا يكرمه يااااارب وجزاه الله خيرا وعذرا لتقصيرى فى زيارة مدونته


نبدأ بقا التاج



س1 : أذكر خمس أحلام على الاقل ..تخص ماضيك



1-اكون متخصصة فى الهندسة الوراثية

2-كنت نفسى ادرس الرسم يعنى اكون فنانة تشكيلية

3-اتعلم العزف على البيانو

4-بطلة فى اى رياضة وامثل بلدى

5-اتعين فى كلية العلوم


س2 : أذكر خمس أحلام على الاقل ..تخص مستقبلك


1-انهى حفظ كتاب الله

2-نفسى بجد انال الشهادة فى سبيل الله

3-اعمل فى التنمية البشرية

4-اكون زوجة كما يتمناها زوجى ان تكون

5-اكون طبيبة شاطرة ومتميزة فى مجالى


أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا

1-جدى والد امى

2-واخت لى فى الله هى فى السعودية حاليا


س4: أعطيتك ثلاث وردات .. من هم الثلاث الأشخاص اللى هتهديهم الورد اللى معاك ؟؟

لخطيبى، امى، مشرفتى


لو أعطيتك ورقة بيها 3 سطور فقط و قلت لك أكتب فيهم اللى أنت عايزه هتكتب إيه ؟؟



انى اسفة لو زعلت حد منى،،، واسفة لو قلت كلمة صعبة لاى حد بدون قصد

انى مش عارفة اشكر ربنا ازاى على انه رزقنى بخطيبى ده وبكل حاجة دعيت بها ووجدتها

وبادعى ربنا يهدى شباب المسلمين ويجعل منهم شباب صالح يعيد مجد الاسلام



س5 : ما هو هدفك فى الحياة ؟؟

رضا ربنا والفردوس الاعلى من الجنة وان زوجى يكون زوج الدنيا والاخرة


إن شاء الله بكرة هيكون أحسن من النهارده"


س6 : هل تصدق هذه المقولة ؟؟ و لماذا ؟؟


اكيييييييييد


لان ده الاصل " تفاءلوا بالخير تجدوه"


س7 : أجمل مقولة سمعتها فى حياتك ؟؟


اساس التميز الحركى هو التميز العبادى


س8 : من المغنى اللى بتحبه أوى


احمد ابو خاطر


و إيه أحلى أغنية ليه بتحبها ؟؟


last breath


س9 : غزة" تمثل لك إيه فى حياتك ؟؟"


يا الله ....بتمثل لى الجهاد فى سبيل الله

وقرب تحيق الامل بنيل الشهادة



س10 : أعطى لإنتمائك لوطنك درجة من مائة ؟؟


مش عارفة لو قلت 100% باكون ببالغ ولا ايه

لكن انتماء بدون تعصب لبلدى يعنى وطنى حدوده اخر شبر فيه دم مسلم


س11 : لو تزوجت و أنجبت بنتين و ولدين أى الأسماء تختار لهم ؟؟ا


لأولاد ( نضال ومعاذ)



البنات ( تقى وأسيل)


س12 : عمرك غشيت فى أمتحان و انت صغير


الحمد لله الذى عافانا





س 13 :لو أتعرض عليك رشوة كبيرة و انت فى زنقة ماليه هتعمل إيه ؟؟



مش هاقدر اقبلها على دينى ونفسى ابداااااا


س14 : قول 3 صفات ب 3 كلمات بس توصف بيهم شخصيتك


حساسة،رومانسية، طيبة



س 15 : برضه بكلمة واحدة ايه اهم صفة عايزها في شريك حياتك


ههههههههههههههههه

انا خلاص اتخطبت وعقدت كمان فأنا عايزاه زى ما هو كده

س16 : ايه المجال اللى غير دراستك وشايف نفسك فيه قوي


محاضرة فى التنمية البشرية


س17 : بتحب السفر؟

ايوة بس مش لوحدى واكون مع حد باحبه


س 18 : طب دلوقتى حالا ايه المكان اللى نفسك تكون فيه



المسجد الاقصى

س19 : تمرر التاج ده لمين ؟؟



صوت الحرية

بس هو مابحبش التاجات

مدونة اختكم فى الله
المرحوم فى التلاجة

الأحد، 20 يوليو 2008

الدرس الثانى

(الدرس الثاني)
الجزء الأول
اخوتى فى الله خلاص الحمد لله تقريبا الكل معانا حدد ادوار ليه فى حياته
والكل ناقش ووصل للترتيبه المناسبه اللى ممكن يمشى عليها حياته
خدنا وقت كتير فى الدرس الاول او ممكن نقول الخطوه الاولى بس ده كان مهم جدا لإن الدرس ده هنبدأ بقى شغل عملى جدا
يعنى زى ما بيقولوا هنبدا ندخل فى الجد ودلوقتي هنشوف هل إحنا فعلا نقدر ولا كنا بنتكلم وخلاص
طيب بداية ياريت كل واحد فيكم يتركز فى دماغه كلمه واحده بس طول ما احنا ماشين فى الدوره الكلمه دى هى
كلمة (اولويه) بمعنى كل ما حاجه حتعملها بعد كده فى حياتك خليها تمر فى الذاكره على الكلمه دى
وخلى الذاكره اللى انت خزنت فيها ادوراك تشوف هل الاولويه للحاجه دى ولا لحاجة تانيه
اتفقنا على النقطه دى خلاص
طيب الحاجه التانيه اللى عاوزاكم تاخدوا بالكم منها
هى إننا فى دورة وضع ادوار وأولويات لحياتنا مش فى دورة وضع اهداف
لإن دى تفرق كتير جدا علشان كدة ياريت كلكم تكونوا فاهمين كويس اوى النقطه دى
طيب نبدأ بقى ندخل فى الدرس إتكملنا المره اللى فاتت عن ادورانا واتفقنا على إن الدور الاول لأى حد فينا سواء
كان اخ أو اخت هو انه مسلم ملتزم إلتزام صحيح وبعدها على طول قلنا إن اى واحد او اوحده بيكون حاجه من الحاجات دى يا إما
1-طالب وقلنا إن هنا الأولويه بتكون لإنه ينجح وبتفوق
او إنه
2-موظف او عامل وقلنا هنا الأولويه أنه يكون احس واتقن واحد فى شغله ويحاول انه يوصل للمراتب العليا عشان
يكون صوره جميله للمسلم الملتزم
او 3-زوجه لا تعمل وهنا قلنا إن الاولويه تكون لبيتها واولادها وتنشئتهم على الإسلام دول كانوا ملخص للدور
التانى اللى مش هيخرج عنه اى حد
وبعدها على طول يجى الدور التالت وهو اى دور انتى ممكن تلعبيه فى حياتك بعد كده سواء كانت رياضه مفضله
ناجحه فيها او هوايه بتحبيها او مجال نفسك تبرعى او غيرها كتير لحد كده إحنا كنا وقفنا وكل اللى كنا بنعمله إننا
نظبط الأدوار دى مع بعض وكنت طلبت منكم كمان إنكم تبدأ وتشوفوا إللى بيتطلبه منكم كل دور من ألادوار وتكتبوه
وفعلا إنتم عملتم ده طيب النهارده حنعمل ايه ؟؟؟؟
النهارده إحنا هنمسك كل دور من الأدوار دى ونبدأ نحط الحاجات اللى المفروض يكون ليها اولويه فى الدور ده
ونوحدها على الجميع بحيث إن الكل يبقى عارف ايه هى الحاجات دى
وبعدها نبدأ نطلب منكم توزيع الحاجات دى على اليوم بتاع كل واحد فيكم يعنى بمعنى اصح بتبدأ تحط اولى خطوات الخطه
وبعدها نبدا نطرح عليكم شوية اسئله ونشوف حتتصرفوا فيها إزاى
كده انا قلتلكم إجمالى الدرس خلونا نبدا بالتفصيل الدرس بتاع النهارده طويل وعشان كده حنحاول نقسمه على اجزاء ونكمل الدرس القادم إن شاء الله

الثلاثاء، 15 يوليو 2008

تابع الدرس الأول:

طيب عشان اسهل لكم العمليه اكتر شويه انا حأديكم مثال
(طالب فى كليه عمليه وفى نفس الوقت مسئول عن جمعيه وبيحب التنميه البشريه وعنده ميول للتجاره )قعد مع نفسه وشاف حياته وطلع ادوراه كالتالى :

(الدور الاول )
دور المسلم الملتزم وده بيتطلب من الأتى
:*صلاه فى جماعه
*صيام
*تلاوة قرأن
*صيام
*قيام ليل
*حضور دروس علم *
دفاع عن الإسلام وغيره كتير بقى
(الدور الثانى )
دور الطالب المتفوق وده بيتطلب منه الأتى :
*حضور المحاضرات
*المزاكره والإجتهاد
*التفوق والحصول على تقدير
*محاولة التعرف على المزيد فى مجال الدراسه وتطبيقه ما تم دراسته عمليا
(الدور الثالث)
دور قائد الجمعيه ومحب علم التنميه البشريه وده يتطلب منه الأتى :
*متابعة افراد جمعيته
*وضع خطط واليات للرقى بالجمعيه المسئوله منه
*تحمل اى مسئوليات اومتطلبات خاصه بالجمعيه
*القرأه فى علم التنميه البشريه
*محاولة حضور دورات
*محاوله تلخيص كتب فى التنميه البشريه وهكذا
(الدور الرابع )
دور التاجروده بيتطلب منه انه :
*يحاول يتعلم اكتر عن شغل التجاره
* يحاول انه يدخل فى أعمال تجاريه
*يحاول انه يعمل مشاريع صغيره وهكذا
جميل جدا الشخص ده بكده يكون انتهى من تحديد ادواره فى الحياه اللى المفروض انه يلعبها
وفى نفس الوقت شاف المطلوب منه ايه فى كل دور
طيب وهو ده ليه اهميه
طبعا ده ليه اهميه كبيره جداااااا
يعنى مثلا لو كان هذا الشاب عنده وقت فراغ يقعد يتفرج على التلفزيون ولا يقعد يقرا قرأن ؟؟؟؟؟؟؟
طيب لو عنده محاضره فى الكليه وفى نفس الوقت عنده اجتماع جمعيه يعمل ايه ؟؟؟
طيب لو اصحابه نازلين يسهروا شويه او اصحابها عاملين حفلة عيد ميلاد بس النهارده معاد انها تقعد تقرأ فى كتاب فى التنميه البشريه تعمل ايه ؟؟؟
طيب لو هو عنده مشروع جميل جدا وحيكسب منه كتير بس فى نفس الوقت عنده مذاكره يكون الحل ايه ؟؟؟؟؟
اه شفتوا بقى هنا تيجى فايده الادوار

طول ما انت عارف ادوراك كويس اوى وحافظها فى دماغك وطولما انت دايما بتفتكرها مع نفسك اى حاجه تقف
قدامك بتمشيها على الأدوار دى واللى ليه الأولويه يبقى هو اللى واجب انه يتنفذ وهنا تلاقى نفسك بدأت تستريح كتير حياتك بدأت تتنظم
بقى فيه رضى داخلى من نفسك عن اللى بتعمله وفى نفس الوقت مش ماشى كده زى ما الريح يوديك
لاء إنت دلوقتى عارف إنت بتعمل ايه كويس اوى لو عندى سهره وعندى مذاكره يبقى الدور اللى لازم اكون فيه هو الدور الثانى دور الطالب المتفوق
لو عندى قيام ليل وعندى نوم يبقى اقيسها على الادوار يطلع ان الدور اللى لازم اكون فيه هو دور المسلم الملتزم

وهكذا تسير بك الحياه فى خط منتظم واضح قادر انت فيه تعرف انت رايح على فين
مش عارفه اذا كنت قدرت اوصلكم الدرس ولا فيه مشاكل
على اى حال ما كان من توفيق فمن الله وما كان من عيب فمن نفسى ومن الشيطان
المطلوووووووووووووب منكم إن شاء الله فى خلال باقى الأسبوع إن كل واحد يقعد مع نفسه ويحدد ادوار حياته
اللى حيكون فيها ويرتبها ترتيب كويس اوى
ويشوف متطلبات كل دور
ويكتبلنا على المدونة هو لقى ايه
وفى نفس الوقت يكتبلنا اما طبق الكلام اللى قلناه كان ايه الفرق
انتظر تعليقاتكم واستفساراتكم
وجزاكم الله خيرا فى أمان الله وحفظه

الاثنين، 14 يوليو 2008

انطلاق دورة خطط حياتك .. تابعونا هنا الآن

السلام عليكم ورحمة الله وبركاته ..‏بداية يسعدنا أن نرحب بالمشاركين معنا في دورة‏ خطط حياتك‏
وأتمنى ان الاعداد تزداد يااااااارب
(الدرس الاول)

السلام عليكم ورحمة الله وبركاته
مرحبا بكم جميعا معنا فى اليوم الاول من عمر هذه الدوره المتميزه إن شاء الله
وكما اشرت سابقا فهى بالفعل ستكون مختلفه تماما غيرها من الدورات سأحاول بقدر الإمكان ان تكون الدروس بلغه بسيطه مفهومه وكأننى اتحدث معكم فى دوره مباشره بحيث تتبسط امامكم الأمور وتتضح بإذن الله
ركزوا معايا كويس وخلينا نبدأ درسنا
بداية عشان نتكلم عن موضوع التخطيط او موضوع إدارة الأولويات حنلاقى إننا قدام مجال واسع جدا ا وفيه كلام كتير اوى ومن هنا بقى كانت فيه شوية مشاكل لازم نتكلم عنها :

المشكله الأولى
هى إن الكلام المذكورفى مجال التخطيط ن اغلبه كلام مظبوط جدا لكن المشكله فى تطبيق الأفراد ليه ليه ؟؟؟؟؟؟؟؟؟
لإن الفرد العادى بياخد اى حاجه عن التخطيط ويبدأ يحاول يطبقها على نفسه مره واتنين وتلاته ويلاقيها فشلت يقوم مجرب طريقه تانيه وتالته ووووو
هو مش واخد باله خالص ان فيه تخطيط خاص بالشركات وفيه تخطيط خاص بالجمعيات وفى تخطيط خاص بالأفراد اللى عايشين فى الغرب وفى تخطيط خاص بلاعبى الكره
وزى ما تقول قول بقى بل إننا ممكن نقول إن كل شخص فى الدنيا المفروض ان خطته تكون خاصه بيه هو يعنى انت بس بتاخد الاساسيات العامه فى التخطيط لكن مش لازم انك تتبع كل حاجه لإن فيه حاجه تنفع معاك وما تنفعشى مع غيرك والعكس يبقى كانت المشكله الاولى اننا ما كناش بنطبق الطريقه فى مكانها السليم


المشكله التانيه
هي كمان مشكله خطيره تظهر لو جينا نشوف ليه بيفشل اغلب الناس فى التخطيط لحياتهم المشكله دى كانت ان فيه حاجات اساسيه مطلوبه مننا قبل ما نبدأ مرحلة وضع الخطه نفسها الحاجات دى رغم انها بسيطه إلا انها مهمه جدا جدا وتفرق كتير اوى اوى معاك لو الحاجات دى فعلا موجوده عندك من الأول حتلاقى نفسك ماشى كويس جدا ومش تعبان فى التنفيذ اما لو كانت مش موجوده هنا بتكون المشكله
طبعا
فيه مشاكل تانيه كتير حتيجى فى وقتها لكن انا حبيت ابدأ بالنقطتين دول عشان اهميتهم عندنا فى البدايه

طيب بعد ما عرفنا الكلام البسيط اللى فى الجزء الاول خلونا نتكلم بقى فى اهم حاجه عندنا فى درس النهارده
وهى البدايه اللى لو اتعملت صح تأكد تماما ان كل حاجه بعد كده فى تخطيط حياتك حتمشى بطريقه مظبوطه تماما طيب البدايه ايه :
البدايه هى انك تعرف وتحدد كويس اوى وخلى بالك من كلمة كويس اوى

(ادوارك فى الحياه )
هى دى يا جماعه البدايه فعلا انك تعرف ادوراك فى الحياه يطلع واحد ويقول يعنى ايه ادوارك فى الحياه
اقولك اناعارفين المشكله بتاعتنا فى كل حاجه هى ايه
المشكله الرئيسيه هى اننا مش عارفين احنا بنعمل ايه وليه
يعنى انت مثلا بتروح الكليه طيب عارف انت بتروح الكليه ليه
ترد وتقول: عشان اتعلم
طيب هى الكليه بتمثل ايه بالنسبه لك
ترد وتقول :يعنى اهى ماشيه معايا من يوم ما اتولدت اول ما اتولدت لقيتهم بيعلمونى اقول بابا وماما كبرت شويه لقيتهم جايبين ليا عداد اتعلم عليه الأرقام شويه رحت الحضانه
وبعدها دخلت مدرسه شويه وبقيت فى الكليه وادينى اهو شغال
طيب انت عارف اللى انت بتعمله ده كله موضعه ايه فى حياتك ؟؟
طيب مثل تانى ينفع مثلا تكون مدير شركه وانا طالب
ترد وتقولى : مش عارف صراحه بس ممكن يعنى ايه المانع
طيب اسألك سؤال تانى لو إنت عضو فى جمعيه من جمعيات العمل الخيرى وعندك إجتماع فيها وفى نفس الوقت المفروض انك تروح معرض الكتاب عشان اخر يوم فى المعرض حتعمل ايه\
طبعا دى بعض الأمثله مش كلها بس النتيجه هنا فى كل حاجه واحده مالم تكن محددا ادوارك فى الحياه حتلاقى دايما نفسك مش عارف تختار ومحتار ومتردد ومش عارف تخطط حياتك وبتمشى بهواك

طيب والمطلوب المطلوب انك دلوقتى حالا تقعد مع نفسك ساعه كده مفيش حد معاك فيها وتبدأ تشوف
حياتك فى الوقت الراهن ومستقبلا وعلى اساس كده تبقى تحدد ادوارك وفى نفس الوقت تحط المطلوب
منك فى كل دور

الجمعة، 11 يوليو 2008

دورة خطط حياتك


السلام عليكم ورحمة الله وبركاته

بسم الله الرحمن الرحيم

.........................وبعد.......

تاية في الدنيا

ومش عارف رايح علي فين

عارف حلمك بس مش عارف تخططله منين


وراك اشغال كتير ومش عارف ترتبها ازاي


كل انسان وليه هدف وكل هدف بيبدأ بحلم وكل حلم ليه خطه لتنفيذه


ايه رأيكم نخطط لحياتنا مع بعض


تعالي ومش هتندم .. هتلاقي الحل معانا في دورة ***خطط حياتك***


تعريف بالدورة وشروطها


سيتم وضع درس اسبوعى بإذن الله على ان يكون يوم الخميس من كل اسبوع


قبل أن نبدأ، ملاحظات بسيطه نوردها على هيئة نقاط محدده :


1 - انكم بإذن الله ستجدون امامكم دوره مختلفه تماما عما سبق تصلح للتنفيذ على كل فرد منكم متى اراد هو وامتلك العزيمه لذلك

2- سيتم بإذن الله وضع درس بصفه اسبوعيه يوم الخميس من كل اسبوع وسنترك باقى الأسبوع للمناقشه والإستفسارات والرد على الاسئله


3- الدوره مصاغه بشكل عملى بمعنى انكم مطلوب منكم الإجابه على اى سؤال يتم طرحه وتنفيذ المطلوب منكم بشكل صحيح


4 -سيتم وضع الدوره كامله على ملف وورد فى نهاية الدوره لكى تكون متاحه امام الجميع


5 - اخيرا اقول لكم امر فى غاية الاهميه نحن نضع امامكم معلومات ثمينه ولا تقدر بثمن وهنا ينتهى دورنا ويبدأ دوركم البعض قد يقتنص الفرصه والبعض قد تضيع منه الفرصه كما هو الحال مع الأغلبيه

نتمنى من الله ان نكون جميعا من المستفيدين


انتظرونا مع المفاجآت ولكن بعد الفاصل....