الاثنين، 14 يوليو 2008

انطلاق دورة خطط حياتك .. تابعونا هنا الآن

السلام عليكم ورحمة الله وبركاته ..‏بداية يسعدنا أن نرحب بالمشاركين معنا في دورة‏ خطط حياتك‏
وأتمنى ان الاعداد تزداد يااااااارب
(الدرس الاول)

السلام عليكم ورحمة الله وبركاته
مرحبا بكم جميعا معنا فى اليوم الاول من عمر هذه الدوره المتميزه إن شاء الله
وكما اشرت سابقا فهى بالفعل ستكون مختلفه تماما غيرها من الدورات سأحاول بقدر الإمكان ان تكون الدروس بلغه بسيطه مفهومه وكأننى اتحدث معكم فى دوره مباشره بحيث تتبسط امامكم الأمور وتتضح بإذن الله
ركزوا معايا كويس وخلينا نبدأ درسنا
بداية عشان نتكلم عن موضوع التخطيط او موضوع إدارة الأولويات حنلاقى إننا قدام مجال واسع جدا ا وفيه كلام كتير اوى ومن هنا بقى كانت فيه شوية مشاكل لازم نتكلم عنها :

المشكله الأولى
هى إن الكلام المذكورفى مجال التخطيط ن اغلبه كلام مظبوط جدا لكن المشكله فى تطبيق الأفراد ليه ليه ؟؟؟؟؟؟؟؟؟
لإن الفرد العادى بياخد اى حاجه عن التخطيط ويبدأ يحاول يطبقها على نفسه مره واتنين وتلاته ويلاقيها فشلت يقوم مجرب طريقه تانيه وتالته ووووو
هو مش واخد باله خالص ان فيه تخطيط خاص بالشركات وفيه تخطيط خاص بالجمعيات وفى تخطيط خاص بالأفراد اللى عايشين فى الغرب وفى تخطيط خاص بلاعبى الكره
وزى ما تقول قول بقى بل إننا ممكن نقول إن كل شخص فى الدنيا المفروض ان خطته تكون خاصه بيه هو يعنى انت بس بتاخد الاساسيات العامه فى التخطيط لكن مش لازم انك تتبع كل حاجه لإن فيه حاجه تنفع معاك وما تنفعشى مع غيرك والعكس يبقى كانت المشكله الاولى اننا ما كناش بنطبق الطريقه فى مكانها السليم


المشكله التانيه
هي كمان مشكله خطيره تظهر لو جينا نشوف ليه بيفشل اغلب الناس فى التخطيط لحياتهم المشكله دى كانت ان فيه حاجات اساسيه مطلوبه مننا قبل ما نبدأ مرحلة وضع الخطه نفسها الحاجات دى رغم انها بسيطه إلا انها مهمه جدا جدا وتفرق كتير اوى اوى معاك لو الحاجات دى فعلا موجوده عندك من الأول حتلاقى نفسك ماشى كويس جدا ومش تعبان فى التنفيذ اما لو كانت مش موجوده هنا بتكون المشكله
طبعا
فيه مشاكل تانيه كتير حتيجى فى وقتها لكن انا حبيت ابدأ بالنقطتين دول عشان اهميتهم عندنا فى البدايه

طيب بعد ما عرفنا الكلام البسيط اللى فى الجزء الاول خلونا نتكلم بقى فى اهم حاجه عندنا فى درس النهارده
وهى البدايه اللى لو اتعملت صح تأكد تماما ان كل حاجه بعد كده فى تخطيط حياتك حتمشى بطريقه مظبوطه تماما طيب البدايه ايه :
البدايه هى انك تعرف وتحدد كويس اوى وخلى بالك من كلمة كويس اوى

(ادوارك فى الحياه )
هى دى يا جماعه البدايه فعلا انك تعرف ادوراك فى الحياه يطلع واحد ويقول يعنى ايه ادوارك فى الحياه
اقولك اناعارفين المشكله بتاعتنا فى كل حاجه هى ايه
المشكله الرئيسيه هى اننا مش عارفين احنا بنعمل ايه وليه
يعنى انت مثلا بتروح الكليه طيب عارف انت بتروح الكليه ليه
ترد وتقول: عشان اتعلم
طيب هى الكليه بتمثل ايه بالنسبه لك
ترد وتقول :يعنى اهى ماشيه معايا من يوم ما اتولدت اول ما اتولدت لقيتهم بيعلمونى اقول بابا وماما كبرت شويه لقيتهم جايبين ليا عداد اتعلم عليه الأرقام شويه رحت الحضانه
وبعدها دخلت مدرسه شويه وبقيت فى الكليه وادينى اهو شغال
طيب انت عارف اللى انت بتعمله ده كله موضعه ايه فى حياتك ؟؟
طيب مثل تانى ينفع مثلا تكون مدير شركه وانا طالب
ترد وتقولى : مش عارف صراحه بس ممكن يعنى ايه المانع
طيب اسألك سؤال تانى لو إنت عضو فى جمعيه من جمعيات العمل الخيرى وعندك إجتماع فيها وفى نفس الوقت المفروض انك تروح معرض الكتاب عشان اخر يوم فى المعرض حتعمل ايه\
طبعا دى بعض الأمثله مش كلها بس النتيجه هنا فى كل حاجه واحده مالم تكن محددا ادوارك فى الحياه حتلاقى دايما نفسك مش عارف تختار ومحتار ومتردد ومش عارف تخطط حياتك وبتمشى بهواك

طيب والمطلوب المطلوب انك دلوقتى حالا تقعد مع نفسك ساعه كده مفيش حد معاك فيها وتبدأ تشوف
حياتك فى الوقت الراهن ومستقبلا وعلى اساس كده تبقى تحدد ادوارك وفى نفس الوقت تحط المطلوب
منك فى كل دور

8 التعليقات:

الزهراء يقول...

يسعدنى ان اكون اول الردود على الدرس الاول فى الدورة فى اول زيارة لمدونتك
.........
تقبل الله منك الجهود وبارك فيها حبيبتى
......
دمت ِ بخير وهناء

حسن حنفى يقول...

شكرا علي هذا الدرس الاول وان شاء الله هكمل بقيت الدروس
ويسعدني ان اعلق علي هذه المدونه الرائعه

همسة قلم يقول...

جميل جدا الدرس الاول

طيب نبدأ التطبيق فورا لكن لازال معنى دور في الحياة غامض بعض الشئ بالنسبة لي يحتاج لمزيد من التوضيح

يعني دور في الحياة اى حياة

حياتي ام حياة المحيطين
اسرتي ام المجتمع

وماذا نعنى بالدور ؟

معلش هاوجع دماغك اخية سامحيني :)

غير معرف يقول...

مممممم

درس جميل

ماشائ ء الله

ربنا يجعله فى ميزان حضرتك يافندم

رُدَّ إلى َّ روحى يقول...

حبيبتى الغالية:

الزهراء

ربنا يسعدك ياااااارب يا جميل وتكون ديه باكورة زياراتك للاستمرار معنا

دمتى على خير

رُدَّ إلى َّ روحى يقول...

اخى المدون:

حسن حنفى

حياكم الله ربنا يعزكم ياااااارب

ويجعله فى ميزان حسناتكم

رُدَّ إلى َّ روحى يقول...

حبيبتى همسة قلم

ربنا يكرمك على تفاعلك معنا فى الدورة

انا نفسى كل المشتركين يسألوا علشان تكون الافادة من الدورة على اعلى مستوى

وان شاء الله حبيبتى هأوضح يعنى ايه دورنا فى الحياة

دمتى على خير

رُدَّ إلى َّ روحى يقول...

اخونا الغالى:حسام

اسعدنى مرورك ومشاركتك فى الدورة

ربنا يسعدك ياااارب