الثلاثاء، 15 يوليو 2008

تابع الدرس الأول:

طيب عشان اسهل لكم العمليه اكتر شويه انا حأديكم مثال
(طالب فى كليه عمليه وفى نفس الوقت مسئول عن جمعيه وبيحب التنميه البشريه وعنده ميول للتجاره )قعد مع نفسه وشاف حياته وطلع ادوراه كالتالى :

(الدور الاول )
دور المسلم الملتزم وده بيتطلب من الأتى
:*صلاه فى جماعه
*صيام
*تلاوة قرأن
*صيام
*قيام ليل
*حضور دروس علم *
دفاع عن الإسلام وغيره كتير بقى
(الدور الثانى )
دور الطالب المتفوق وده بيتطلب منه الأتى :
*حضور المحاضرات
*المزاكره والإجتهاد
*التفوق والحصول على تقدير
*محاولة التعرف على المزيد فى مجال الدراسه وتطبيقه ما تم دراسته عمليا
(الدور الثالث)
دور قائد الجمعيه ومحب علم التنميه البشريه وده يتطلب منه الأتى :
*متابعة افراد جمعيته
*وضع خطط واليات للرقى بالجمعيه المسئوله منه
*تحمل اى مسئوليات اومتطلبات خاصه بالجمعيه
*القرأه فى علم التنميه البشريه
*محاولة حضور دورات
*محاوله تلخيص كتب فى التنميه البشريه وهكذا
(الدور الرابع )
دور التاجروده بيتطلب منه انه :
*يحاول يتعلم اكتر عن شغل التجاره
* يحاول انه يدخل فى أعمال تجاريه
*يحاول انه يعمل مشاريع صغيره وهكذا
جميل جدا الشخص ده بكده يكون انتهى من تحديد ادواره فى الحياه اللى المفروض انه يلعبها
وفى نفس الوقت شاف المطلوب منه ايه فى كل دور
طيب وهو ده ليه اهميه
طبعا ده ليه اهميه كبيره جداااااا
يعنى مثلا لو كان هذا الشاب عنده وقت فراغ يقعد يتفرج على التلفزيون ولا يقعد يقرا قرأن ؟؟؟؟؟؟؟
طيب لو عنده محاضره فى الكليه وفى نفس الوقت عنده اجتماع جمعيه يعمل ايه ؟؟؟
طيب لو اصحابه نازلين يسهروا شويه او اصحابها عاملين حفلة عيد ميلاد بس النهارده معاد انها تقعد تقرأ فى كتاب فى التنميه البشريه تعمل ايه ؟؟؟
طيب لو هو عنده مشروع جميل جدا وحيكسب منه كتير بس فى نفس الوقت عنده مذاكره يكون الحل ايه ؟؟؟؟؟
اه شفتوا بقى هنا تيجى فايده الادوار

طول ما انت عارف ادوراك كويس اوى وحافظها فى دماغك وطولما انت دايما بتفتكرها مع نفسك اى حاجه تقف
قدامك بتمشيها على الأدوار دى واللى ليه الأولويه يبقى هو اللى واجب انه يتنفذ وهنا تلاقى نفسك بدأت تستريح كتير حياتك بدأت تتنظم
بقى فيه رضى داخلى من نفسك عن اللى بتعمله وفى نفس الوقت مش ماشى كده زى ما الريح يوديك
لاء إنت دلوقتى عارف إنت بتعمل ايه كويس اوى لو عندى سهره وعندى مذاكره يبقى الدور اللى لازم اكون فيه هو الدور الثانى دور الطالب المتفوق
لو عندى قيام ليل وعندى نوم يبقى اقيسها على الادوار يطلع ان الدور اللى لازم اكون فيه هو دور المسلم الملتزم

وهكذا تسير بك الحياه فى خط منتظم واضح قادر انت فيه تعرف انت رايح على فين
مش عارفه اذا كنت قدرت اوصلكم الدرس ولا فيه مشاكل
على اى حال ما كان من توفيق فمن الله وما كان من عيب فمن نفسى ومن الشيطان
المطلوووووووووووووب منكم إن شاء الله فى خلال باقى الأسبوع إن كل واحد يقعد مع نفسه ويحدد ادوار حياته
اللى حيكون فيها ويرتبها ترتيب كويس اوى
ويشوف متطلبات كل دور
ويكتبلنا على المدونة هو لقى ايه
وفى نفس الوقت يكتبلنا اما طبق الكلام اللى قلناه كان ايه الفرق
انتظر تعليقاتكم واستفساراتكم
وجزاكم الله خيرا فى أمان الله وحفظه

32 التعليقات:

إسلام يقول...

فعلا تحديد الادوار خطوة مهمة حتى تصبح الرؤية واضحة لكل منا .. وبعد ذلك يحدد أولوياته عن طريق قياس الفرص والتهديدات والمزايا والعيوب..

جزاكم الله خيرا على اثارة هذا الموضوع المهم..

حادي الأرواح يقول...

سلام عليكم
أولاً جزاكي الله خيراً على زيارة مدونتي المتواضعة
ثانياً جزاكي الله خيراً كثيراً على هذا الموضوع الرائع
أنا فعلاً كنت بفكر فيه من فترة لأن ترتيب الأولويات هو السبيل لتحقيق النجاح والوصول للسعادة
أما ترك الأمور على أحوالها كما هي دون ترتيب فهذا يؤدي لعدم النجاح فيها والشعور بالفشل وبالتالي الأحباط وهذا الذي يؤدي بالإنسان لمعصية الله

حسن حنفى يقول...

شكرا علي الموضوع
وان شاء الله هعمل جدول وقبي ققول النتيجه
( بس يا ريت التزم بيه )

aaahhmd يقول...

السلام عليكم
يااختى رد الى روحى الكلام دا جميل جدا
وربنا يعينك اخيتى بس اعزرينى ان اقول رئى بصراحه هذا الكلام نظرى ولا يرقى الى تطبيقة الا فئة بعينها لا كل الناس ياريت تنزلى شويه تحت مع الناس ولو كتبتى نبض الشارع هايكون احسن وعلى العموم جزاكم الله خير

طلاب من أجل مصر يقول...

السلام عليكم

اختي ..طيب مثلا انا طالب ..وعندي برده حجات كتيره بعملها بس مش عارف ايه هيه الحجات اللي انا عضو فيها

انتي ضربتي مثل ..بس مش عارفه اطبقه عليا يريت تقولي كمان مثال للطلاب ..لان احنا كمان لينا دورنا

تحياتي

قلم حالم يقول...

جزاكِ الله خيراً كثيراً

صدقت تحديد الأدوار اهم عامل من عوامل النجاح
أفادني هذا كثيراً في الثانوية

لكن المشكلة في المدوامة على تحديث هذه الادوار في كل مرحلة

جزاك الله خيرا مرة أخرى

غير معرف يقول...

ادوار واولويات


يارب يكون العقل الخاص بيا لسه فيه مساحه فاضيه عشان يفهم الحاجات دى

..........

ماشاء الله بجد موضوع مميز

وفقكى الله دائما ياااارب وجعل جهدك فى ميزان حسناتك

يااااااااااااااارب

"النجم القادم" يقول...

السلام عليكم

بارك الله فيكى اختنا الفاضلة

بجد حاجات جميلة ربنا يعزك

بس بجد انا اتحولت عبال لما عرفت اقرا

ولكن جميلة الادولويات والادوار دى

اوعى تفكر يقول...

اكيد تحديد الادوار ده مهم جدا
فالانسان من غير ما يحدد اولويات وادوار
هيضيع

رُدَّ إلى َّ روحى يقول...

جزاكم الله خيرا اخى :
إسلام

ويارب تكون استفدت فعلا وكتبت فى ورقة اولوياتك

لان مجرد السرد الذهنى لا يكفى لابد من تدوينه عندك

حياكم الله

رُدَّ إلى َّ روحى يقول...

السلام عليكم ورحمة الله وبركاته

اخى المدون:

حادى الأرواح

ما شاء الله مدونة حضرتك جميلة جدا...

ربنا يبا رك فى جهدكم فيها


وجزاكم الله خيرا على تشريف المدونة

حياكم الله

رُدَّ إلى َّ روحى يقول...

السلام عليكم ورحمة الله وبركاته

اخى المدون:

حسن حنفى

ياريت تبقا تكتب لنا الجدول بتاعك

كنوع من التشجيع لى

ولباقى المشاركين

بارك الله فيكم

حياكم الله

رُدَّ إلى َّ روحى يقول...

السلام عليكم ورحمة الله وبركاته


هههههههه اخى المدون :

احمد

يا فندم الكلام ده واقعى جدااا

وعملى وعلمى

بس حضرتك شد حيلك معنا وان شاء الله هننجح

حياكم الله

رُدَّ إلى َّ روحى يقول...

السلام عليكم ورحمة الله وبركاته

اخى المدون: عبد الهادى

هاضرب لحضرتك مثال تانى

حضرتك طالب مسلم ملتزم قوى الجسم

يبقا كطالب مطلوب تكون عارف دورك المرحلى اللى انت عايشه
بمعنى تذاكر اول بأول وتحضر دروسك
وايضا انت قوى الجسم يعنى لو ميعاد ماتش كرة او تدريب جيم

بس لو جاء ميعاد الكرة فى ميعاد درس عندك

يبقا اولوياتك الدرس

يارب يكون المثال واضح

حياكم الله

رُدَّ إلى َّ روحى يقول...

السلام عليكم ورحمة الله وبركاته

اختى الفاضلة يسرا:

تواجدك فى المدونة زادها تألقا ونورا

حضرتك أثرتى نقطة مهمة وهى المداومة

هأقول لحضرتك على حاجة

فيه نوعين من الدوافع:

دوافع داخلية ودوافع خارجية

الدوافع الخارجية منها قراءة كتاب ،سماع كلمة

هذه الدوافع تأثيرها وقتى يعنى بالكتير كم ساعة

اذن للاستمرار نعمل ايه؟

1- ممكن حضرتك تكتبى كلمات معينة أثرت فيكى وتعلقيها فى غرفتك

2-تنشرى الفكرة مع صحباتك وتكون معاكى مجموعة تعرفيهم كل جديد وكلكم تشدوا بعض وتشجعوا بعض

ربنا يكرمك وحياكم الله

رُدَّ إلى َّ روحى يقول...

السلام عليكم ورحمة الله وبركاته

اخى الفاضل حسام

حضرتك فيه حاجة مهمة عايزة اوضحها لحضرتك

ان العقل بيفكر بشكل اتجاهى بمعنى ايه؟


انك لو قلت لعقلك انك فاشل عقلك هيبرمج نفسه على الفشل ومهما حاولت تغيره هيكون صعب ان لم يكن عندك الدافع للتغيير

وبالمثل لو انت قلت لعقلك مفيش عندى مكان فاضى علشان احدد اولوياتى هيكون كده فعلا

فالعقل يبفكر بشكل اتجاهى

فبرمج عقلك وصالح نفسك

وياريت تكون اى مصاعب انت مريت بيها فترة مخاض لولادة شخص جديد صلب قادر على المشى على الماء وفعل المستحيل بقوة عقيدته ويقينه فى الله

حياكم الله

رُدَّ إلى َّ روحى يقول...

السلام عليكم ورحمة الله وبركاته

اخى المدون:

النجم القادم

جزاكم الله خيرا على تشريفكم المدونة

ومعذرة على صغر الخط بس حسيت انه أشيك وهو صغير كده

بس المرة القادمة هاكبره ان شاء الله

حياكم الله

رُدَّ إلى َّ روحى يقول...

السلام عليكم ورحمة الله وبركاته

اخى المدون:

اوع تفكر

شرفت المدونة

وفيه نصيحة اهمس بها اليك

لابد من كتابة اهدافك لا تكفى سردها فى عقلك

حياكم الله

غير معرف يقول...

السلام عليكم ورحمة الله وبركاته

فعلا الموضوع جيد جدا يادكتورة وحيوى.... كتير من الناس دلوقتى عايشين ومايعرفوش هم عايشين ليه اصلا...
فعلا معرفه ادوار الانسان ده كويس جدا علشان يعرف يأدى فى كل دور كويس جدا اللى بيها يعمل اتزان فى حياته.....
علشان كده انا بضم صوتى لصوتك وبنادى بان كل واحد لازم يعرف كده علاوة على كده انا كنت بقترح انك ممكن تتكلمى عن عجله الحياة او الاربع الاحتياجات اللى كل واحد بيدور عليهم او اللى بتتمركز حياة اى شخص عليهم وانه ازاى يعمل اتزان ما بنهم ولو تسمحيلى انا ممكن اساعدك فى حاجة زى كده ومنها يكون تدريب عملى لينا احنا كمان لان المهارات ده لا تعتمد على الناحية النظرية فحسب بل هيه عمليه اكتر منها عمليه وده كان واضح كتير من كلامك

فعلا جزاك الله عنا خير الجزاء وربنا يجعله فى ميزان حسناتك ان شاء الله

أحمد الديب

Dr. Ibrahim يقول...

دورة خطط حياتك

فين الموضوع ده

الريدير قراه ولما جيت ادخل مفيش حاجة
------------

المهم

تحديد الأدوار طبعاً هو تحديد الهدف

وتحديد الهدف هو أول خطوة للنجاح بغذن الله

فنحن لا نسير " بالبركة"

ولك لكل منا دوره فى الحياة وعند إختلال هذا الدور يتختل انظمة الحياة

بارك الله فيكم

د/هيما

Hosam Yahia حسام يحيى يقول...

مانا برمجته على كده فعلا يادكتوره

رُدَّ إلى َّ روحى يقول...

السلام عليكم ورحمة الله وبركاته

باشمهندس احمد مروركم اسعدنى كثيرااااا

وبجد يشرفنى ان حضرتك تساعدنى فى الدورة

وربنا يجعله فى ميزان حسناتك يااااارب

حياكم الله

رُدَّ إلى َّ روحى يقول...

دكتور ابراهيم

احنا لسا بنبدأ الدورة يعنى لسا ماتكتبتش فى المدونة

كل اللى كتبناه هو تحديد الاهداف كخطوة اولية فى طريق الدورة

اتمنى الموضوع يكون اتضح لحضرتك

واى لبس او سؤال تحت امركم

شرفتم المدونة

حياكم الله

رُدَّ إلى َّ روحى يقول...

اخى الفاضل حسام

فهمنى بس حضرتك برمجته على ايه؟

سمية-بنت البنا- يقول...

السلام عليكم ورحمة الله وبركاته


حبيبتي رد إلي روحي ...

كيف حالكِ..؟؟

ترتيب وتنظيم يجب أن يتطرق إلي كل شئون الحياة ..


جزاكِ الله خير الجزاء ...

وبوركتِ

غير معرف يقول...

تمام كده :)

يعني نقدر نقول انه الادوار مرادف للاولويات في حياة الواحد عليه انه يرتبها وينفذها بخطة واضحة تجمع بنهم ولا تتعارض مع بعضها ..

يعني ده اللى فهمته على الاقل :)

ان شاء الله ننفذ الواجب العملي بس لو اتأخرت شوية اعذريني حبيبتي فاحتمال اكون على سفر الاسبوع القادم

دمتِ بكل ود :)

رُدَّ إلى َّ روحى يقول...

حبيبتى الغالية :

سمية

نورتى المدونة وعايزينك معنا بقوة

وتكتبى لنا اولوياتك

علشان تفيدينا بها

وحشانى كتييييير

دمتى على خير يااااارب

رُدَّ إلى َّ روحى يقول...

حبيبتى همس القلم

منتظرينك حبيبتى وماتغيبيش علينا

ربنا يكرمك ويحميك
حياكم الله

Unknown يقول...

الأدوار فى الحياه كتير اوى وكلام حضرتك منطقى بس مش بسهوله هنقدر ننفذه على أرض الواقع

لأن النفس البشريه من طبعها التمرد واللى فى دماغها هتعمله وهيصل تشابك فى الأدوار ومش هنعمل دى ولا دى بس ياريت نحاول على قد ما نقدر نعرف أدوارنا


مصطفى

غير معرف يقول...

يتشرف موقع شرقاوى اون لاين بدعوة حضرتك لحضور ندوة بعنوان

آداب الخطوبة وفنون الاختيار

مع الدكتورة إيمان عزب الاستاذ بكلية الصيدلة

وذلك يوم الاثنين القادم في تمام الساعه 8.30 مساءا

http://sharkawyonline.net/vb/showthread.php?t=14166

رُدَّ إلى َّ روحى يقول...

السلام عليكم ورحمة الله وبركاته

اخى ايجى بوى"مصطفى"

جزاكم الله خيرا على المرور

لكن كل رجائى انك تعطينى وتعطى نفسك الفرصة اننا نتغير

شرف المحاولة يكفينا

فمعلش خلينا نمشى خطوة خطوة

ربنا يكرمك على المرور

حياكم الله

رُدَّ إلى َّ روحى يقول...

موقع شرقاوى اون لاين

بصدق شرف كبييييييير لى تلك الدعوة للحضور

وان شاء الله هاحضر فى الموعد المحدد

جزاكم الله خيرااااا